Cebuano News: 23 ka panimalay gipanghiklin sa engkwentro sa Cabacnitan

By Rey Anthony H. Chiu / Philippine Information Agency

LAING KINABUHI NASAYANG. Lima ka mga rebelde ang wa pa mailhi nga nagbuhis sa ilang kinabuhi sa kawsa nga gipahimuslan lamang sa ilang mga lider, sa labing bag-ong engkwentro sa Bohol. (PIA Bohol)

CORTES, Bohol – Kawhaan ug tulo ka mga bubong nga nagrepresentar sa mga banay nga naduol sa lugar diin nagka engkwentro ang mga sundawo ug mga rebeldeng komunista karon ang gihiklin ngadto sa Barangay Hall sa Barangay Cabacnitan alang sa ilang kaluwasan.


Kini maoy gibutyag ni Kapitan Zosima Sumagang sa usa ka radio interview, samtang nagpadayon pa ang sinukliay sa bala sa mga sundawo sa 47th Infantry Battalion ug giingon nga napulo ug usa ka sakop sa mga komunista nga New People’s Army didto sa Sitio Langub, Brgy. Cabacnitan.


Matud pa sa Kapitan, may usa ka kagawad gani nga didto nanimuyo uban sa 23 ka bubong sa kabalayan sa nahisgutang sitio.


Alas 5:30 sa buntag diha nga ang nagpatrolya nga koponan sa mga sundawo nga sakop sa 47IB ang nahidangat sa sitio Langob, diin sila una nga gipabuthan sa mga armadong tawo, segun sa taho.


Dali nga nakapahiluna ang mga sundawo sa mga nagkadaiyang firing positions samtang nagpakatag sa mga kontra nga nanagan dalang hupo aron dili maigo sa mga bala.


Human sa unang salto, lima dayun ka mga sakop sa mga rebeldeng NPA ang nagbahag ang ikog ug gipangbiyaan sa ilang mga kauban , samtang usa ka sundawo ang nasamdan ang gidali og medical evac aron matambalan.


Usa sa mga napatay sa engkwentro, usa ka kabaye, apan sa lima nga napatay, gipugngan pa ang mga identities hangtud nga makompirmar ug mapahibaw sa mga tinugyanan ang mga tagtungod, matud usab ni Lt. Elma Grace Abulencia, information officer sa 47IB.


Tungod sa mopping up operations, may wala usab mga kompirmar nga taho nga may usa pa ka samaran nga napunitan sa mga kasundalohan ug gikarga paingon sa tambalanan sa panghinaut nga maluwas pa kini.


Segun sa susamang taho, usa ka major nga surgery ang gikinahanglan aron maluwas ang samdan.


Segun pani 47IB Community Relations Office Lieutenant Elma Grace Abulencia, padayon pa ang paggukod sa mga rebeldeng nagkabutagsa og panagan, samtang gipaabut nga may mahimong dugang pang samaron nga mabangawan sa dili madugay.


Karong mga semanaha unta, ang Army lakip na ang mga nakigtambayayong nga mga kompanya ug mga mingboluntaryo, maghimo unta sa mga Community Pantry sa mga conflict areas sa Bohol sama sa Brgy Dagohoy, Bonifacio sa Bilar, ug sa Brgy Aloja, Rizal, ug Behind the Clouds sa Batuan.


May giandam na nga mga personal hygiene kits, mga pagkaon, og mga panginahanglanon sa panimalay, sa programang "Kapwa ko, Sagot Ko."


Bisan pa sa hitabo, sa nagkahilis nga mga rebelde sa Bohol, miaghat gihapon ang mga tinugyanan nga dawaton na ang gitunol nga kamot sa kagamhanan aron sa katapusan, taposon na ang local nga armandong pagpanagbangi segun sa aghat sa Presidente. (rahc/PIA-7/Bohol)

1 view
No tags yet.